Mi mues äs vorwäg nä! D’Kumpel scho am erschtä wichtigä Iwent ufä Arm znä isch nid ganz fair, aber iz isch äs haut passiert u luschtig gsi isch äs auimau.

Mir hei üs nämläch am 24. März zur erschte offizieuä Houptversammlig troffä. Näbe viu Glir hei mär o di wichtige Datä für das Jahr chönnä feschtlegä. Ersch am Schluss hei när äs paar müessä schwitzä, meh derzuä spetär:

• Am 2. Juni organisiert dr Pierre ä Surprise-Iwent. Niemär het ä Ahnig was passiert, aber nachem Chico wird’s ä rächti Sach... Uf jedä Fau duräts zwe Nächt.
• Scho gli druf, nämläch am 31. Juli weimär de ga Bötlä uf d’Aarä. Isch klar das dert nid numä d’Aarä wird fliessä.
• Am Friti 22. September wei mer de ufbrächä zurä grossä Wanderig. Dr Chrischu u der Luki hei öppis grossäs vor. Hoffentläch chunnt das guät. Ig tragä dr Gipfu-Wi de sicher nid mit.
• Schliessläch heimär am 2. Dezämbär äs Heimspiel. Gourmeabä mit Gravattäpflicht. Im "Gourmet si", si ja di meischtä scho rächt guät. Numä säubär chochä cha öppä no kenä...

Am Schluss vor Sitzig hei de äs paar vo üs no nä wichtigä Punkt z’besprechä gha. U zwar ischäs drum gangä, dass mir nid hei wouä hiinä, dass äs paar vo üs säch düä abgränzä u alei nach Barcelona fahrä. Ds dr Hadi, Luki, Vali und ig das numä aus "versteckti Kamera" hei planät gha, het von denä armä Tröpf niemär gmerkt u so hei die armä Cheibä vor OS-Group (Lehrgruppe zum Beschta vor HSW) ganzi zä Minutä gloubt mir machä ärschnt u hei säch schampar ufgregt. Dr Jan (wär o schüsch) het sogar vor Bedienig chli müessä brämst wärde, wüä är ä chli lut isch gsi. Äs isch o ke Zuäfau, dass mir d’Kamera i mim Rucksack zimläch uf ihn u uf ä Pierre hei grichtät gha. Schliessläch si di zwe bekannt für ihri Vorliebi "DISKUTIERÄ". Dr Marc wär is de no fasch id Queri cho, wüu är Partei für üs ergriffä het u zimlich viu Verständnis het ufbracht.

Schliessläch het de nach zä Minute dr Wecker ungäräm Tisch glütä u mir hei z’Lachä eh nüm chönnä verha, auso heimär di armä Tröpf ufklärt. Leider gset me di verdutztä Gsichter nid vo üsnä beschtä beschtä Fründä, wüu dr Akku läär isch gsi ir Videokamera – Schande, Schande. Wi eifach das dr Kurt immer gmacht het, isch üs ersch izä ufgfaue. Jedefaus isch niemär bös, sondern eher erliechtärät gsi und aui hei glückläch chönnä fertig trinkä.

Uf jede Fau isch dr Alass glungä gsi, ou we fiu vo üs no hei a di mündlichi Franz-Prüefig müessä am nächschtä Tag. Numä dr Marc hets scho dürä gha – gäu Marcelinde? Für d’Zukunft chama numä z’Beschtä erwartä, we das so witergeit.......

Autor: Steffi alias Kurt F.