Äs isch wider mau Zyt gsi, e Event dürezfüehrä, wo mir üs änds Septämber für üses Wander-Weekend hei z Bärn am Bahnhof troffe. Mi het sich ir Zwüschezyt doch rächt lang nümm gseh u viu erläbt, wo me sich z verzeue het gha. Äs si o fasch aui zu abgmachter Zyt a abgmachtem Ort uftoucht. Äbe nume fasch, wüu einersits dr Märcu no uf sire Südamerika-Reis isch gsi und zwöitens Mr. Pünktlichkeit dr Zug no grad vo hinge het chönne bewundere.

Irgendeinisch si mir sibe de z Grindelwald acho, si üs zersch mau go d Mäge füue und hei mau chli pletschet, was mir so ir letschte Zyt erläbt hei. När si mir chli go z Dorf unsicher mache und hei nach mehrere Versüech de doch e Schuppe gfunde, wo chli öppis louft. Natürlech isches nid lang gange, bis zwe vo üs - äs si immer di gliche und äs wärde wou o immer di gliche si - uf d Froue los si. Meh aus so viu isch ömu nid drus worde, di bluetjunge Chicks hei de üses Huus schlussändlech scho gäg di füfe am Morge verlah...

Meh oder weniger zeichnet vo de Strapaze vo vorderer Nacht si mir de am Samschti Morge gli mau ufgstange, hei packt und si - nachdäm mir üser Rucksäck mit Fressalie gstopfet hei - Richtig Klini Scheidegg loszöttlet. Üsi Organisatore hei sich für üse Wander-Tag natürlich z schönschte Wätter usgsuecht. Unterwägs hei mir bi strahlend schönem Wätter viu gwüsst z brichte. O wenn sich d Gspräch zwüschine nume um Ischwürfle und brönnendi Ouge dräit hei, wärs doch übertribe, z behopute, äs sig vorwiegend jugendfreis Züg verzeut worde. Aui si öppe de mau froh gsi, wo mir ir Häufti si gsi, wüu denn isch "Fressorgie Nr. 1" agseit gsi. Mir hei ändlech chönne üser schwäre Rucksäck uspacke und mau afa losmampfe. Äs isch sehr gmüetlich gsi, mau abgseh dervo, dass Mr. gsundi Ernährig het z Gfüehl gha, är müess di andere bi jedem Biss Salami drüber orientiere, wie viu Fett i sore feine Wurscht isch. Als ob öpper a das Weekend wär cho mitem Ziel, abznäh...

Nach eme churze Ratespiu zwüscher OS-Group (= "Operation Saufen" neuerdings, dr Name het churzfrischtig müesse gänderet wärde...) und de andere Jungs, wo sich d OS-Group-Member schnäu es paar Bierli verdient hei, isches los gange: äs hett mau e richtigi Show gä, und zwar vo däm, wo mes am wenigschte erwartet hätt. Aus stille und sehr überleit handlende Zytgnoss fallt är nie uf, äs isch ihm i aune Läbessituatione scho immer wohler gsi, im Hintergrund z blibe. Dä wo d Members vo üsem Vereinli chli kennt, weiss genau, dasses sich hie ume Steffu Stuker handlet...Är isch i nid ganz alltäglicher Alegig (whatever that means) über z Fäud gsecklet, dr Hadi het flissig fotografiert und dr Stuker het gluegt, dass är nid z spät wider bi üsem Plätzli isch gsi - mi wott ja nid z viu Ufsehe erwecke!

Nachdäm mir üs gnue hei ad Chöpf glängt - oder hei chrummglachet, je nachdäm - isches de witer gange mit tschumple. D Rucksäck si itz zwar liechter gsi, derfür si d Bei immer wie schwärer worde. Öppe so um di sächse si mir uf dr chline Scheidegg acho, hei d Zimmer bezoge und när hets scho bald Znacht gä. Ah ja, wasi fasch vergässe hätt: dr Steffu het langsam sini Stimm afa verlüre, mi het ne zwüschine chum me verstande. Das dünkt mi insofern erwähnenswärt, als dasses när dütlich ruhiger isch worde. Nachem ässe isch d Frag gsi, was itz louft. Jasse isch agseit gsi, aber da hets no so einigi Problemli z löse gä. Aui zäme hei mir nid chönne jasse, wüu MMV (Mister-Mimöseli-Vallotton) nie meh im Läbe mitem MTAJB (Mister-Toleranz-als-Jasspartner-Bume) wird jasse, da dä ihn ja am 13. Juni 1986 uf so miesi Art und Wiis druf ufmerksam gmacht het, dass är dr erscht Stich, wo z Näll, z Trumpfas (vom Partner MTAJB) und z zähni gläge si, de unschiniert mitem Trumpfbuur hätt chönne näh. Nei, nachtragend isch är überhoupt nid. Usserdäm isch dr Pierre o nid grad dä, wo z jasse erfunde het. So hei mir üs de druf chönne einige, dass dr PMW, PAV und OCB (da isch doch mau no Chrischus soziali Adere zum Vorschin cho, wau) hei zäme gchärtlet und die andere vier zäme. So hetts ömu de - wenni mi nid tüsche - für aui gstumme. Im Verlouf vom Abe het sogar dr Pierre Fröid drann übercho; ob das aber nume mit de Charte z tüe het gha oder o mit de feine Kafi Schneechätzli (oder ähnlich), weissi leider nid.

De isch mau fertig chärtle und trinke und pletsche gsi, üs hei si us dr Beitz gschmisse und mir si uf z Zimmer. Nachdäm när dr Luki am Bume gnueg Vorwürf gmacht het, wie wenig hilfsbereit dä sig, si o di letschte igschlafe. Am nächschte Tag bim Morgeässe si nid aui extrem knusprig gsi. Gli simer losgwanderet, äs isch widerum e wunderschöne Herbschttag gsi. Am Fuess vor Eigernordwand entlang het me uf de schneebedeckte Wägli guet gmerkt, dasses in Malta nid viu schneit. Isch ja glich, Houptsach äs isch luschtig gsi, am Pierre zuezluege, wie är mit de Tücke vom Isch kämpft. Zum Zmittag hei mir de Lukis Plan gfolget und si üs öppe ir Häufti vom Wäg go e Mega-Chässchnitte inezieh ("Fressorgie Nr. 2"). Damit är nid verruckt wird, muessi wou erwähne, dass si isch fein gsi...wär fasch es Plätzli füre Gourmet-Alass.

Nachem ässe si di krasse Jungs uf z Bähnli, di beide CRNB (Costa Rican Nature Boys), dr Pierre und dr Vällu si bis nach Grindelwald abe gloffe - äs isch ja schliesslich es Wander-Weekend gsi, hani ömu gmeint.

Z Grindelwald hei mi no schnäu d Wohnig ufgrumet. Uf dr Heireis si mir aui chli kaputt gsi. Äs het nume no uszdiskutiere gä, wär dr Bricht vo däm Event darf schribe. Äs hei sich wider mau aui drum grisse, so mit Begründige wie "eifach so", um di beschti grad z erwähne. Aus Präsi hani mi de natürlich mit dr amtliche Autorität chönne düresetze und darf ne schribe. Jedefalls het mi gfröit, dass d Initiative ume isch gsi. Aber sit nid truurig Jungs, dr nächscht Event chunnt sicher, wo de e andere darf schribe.

Zum Schluss wetti no, wie sich das so ghört, de beide Organisatore härzlech danke für dä guet organisiert Event. Äs isch wider mau e ganz e glungi Sach gsi. So söus si und so wird's hoffentlich o i Zuekunft blibe.

Jan Bumann