Nachdäm mir üs am morgäfrüäh ufäm Bahnhofparking troffä hei, simär scho gli mau richtig Seeland losbrättärät. Niemär, ussert natürläch üsä Captain, dr Chrischu het gwüsst wos härägeit. Die meischtä hei äuä no gar nid zum Gsicht usgse, aber mir si ömu irgendwenn amnä Seeufer gsi bi schönschtem Wätter. När simär, welch Überraschung, ufnäs Boot gumpät. Ufdär Fahrt het när mau jedä chli vo sim nöiä Job chönnä plagaschtärä... Für nä Septembertag ischäs no rächt warm uds Wätter eifach geniau – logisch, wesäch d Sünneli träffä....

Anschliessend simär inäs Wy-Museum, wo mir rächt viu würkläch interessanti Infos zum Wy-Machä hei mitübercho. Zum Bischpiu, dass d Bärner Bar „Räblus“ ihrä Namä vom glichnamige Viech het, wo di europäische Räbstöck-Wurzlä afrisst u kapput macht. Drum steckt mä die europäische Räbstöck (di cheibä gäbä äbä guätä Wy) mit amerikanischä Wurzlänä zämä (di hei d Räblüs nid gärn, drfür gits o ke guät Wy..). U so het mä am Schluss ä Zwitterpflanzä wo feinä Wy ergit.

Chum dert fertig u näs Glesli feinä „Räbhuänoug“-Wy intus (Oeil de Predrix), simär när widär chli ufds Schiff u si scho gli mau bir Petersinslä acho. Dert heimär chli gfischälät u drzuä witer gügälät.

Widär ufs Schiffs u zrügg zum Outo, mitärä chlinä Glace-Pouse drzwüschä, wo d VMÖ-Kasse het überno - schliessläch heimär üs müässä sterckä für das wo när isch cho.

Expo-Drom het dr nächscht Haut gheissä ir nechi vo Murtä... Dert heimär Heum u Übergwändli gschnappät u hei uf dr Bahn (für üs alei) äs Qualifäing gschtartet. D Fahrkünscht u dr Muät si überau öppä chli usglichä gsi, einzig d Motorästerchi het dr Ungerschied usgmacht. Numä ei Fahrer het müässä ufgä wägä Schwinduafäu...

Nächär ischs ids Rennä u dert grad ä Schrecksekunde ir erschtä Kurvä. Dr Chrischu, Füährändä nachäm Quali und uf Pole het gägä starch Motor vom Stukic uf dr Startgradi ds nachsehä ga u het probiert, das mit fahrerischem Geschick und Kalkül wetsmachä. Das isch aber hinger usä, so wie är o u so het är ds Rennä müässä vo hingär ufrouä...

Dr Räscht isch gli verzeut, ds schneuschtä Outo het gwunnä u äs het säch aber o zeigt, das ds Gwicht vo dä Fahrer nid usschlaggäbend für nä schnäui Rundi isch gsi. Dr Christian het bim Rennä statt uf Tubä haut ufä Uslöser for Kamerä drückt...

Anschliessend isch d Equipe müäd u hungrig ufä Heiwäg u dr Seeland-Event isch somit o scho widär verbi gsi. Chrischu, merci viu mau fürd Organisation vo däm Event, numä schaad, das di Know-How-Vorteil nid hesch chönnä inä Medaille ummünzä :-)

Stukic