5. April 2003

Am 5. April hei mir üs in Züri troffä um ä vom Luki organisiertä Kultur-Event ds gniässä. Wie gewohnt, het Luki natürläch auäs im Griff gha (so hets ömu gschunä...).

Zersch si mir id Riithauä ga ässä, auerdings nid ds verwächslä mit dr Riithauä ds Bärn, ds Züri isch das nämläch äs spezieus Resturant imnä ehemaliäg Rossstau. Komischerwiis hets kenä fertig bracht äs Stück Rossfrleisch ds ässä! Ds Ambiente isch würkläch sehr spezieu gsi u het doch irgendwie so inä Kultur-Event inäpasst!

Nächhär hei mir üs mit dä öffentlächä Verchehrsmittu zum eigentlächä Ereignis verschobä, ämnä Theater irgendwo im Niemandsland vo Züri. Üs ischäs scho chli komisch vorcho, dasäs einersiits numä äs chlis Theäterli gsi isch us zwöitäns nid auzuviu Lüt het gha. Mir si aber immer no drvo usgangä, das dr Luki das absichtläch so planät het gha, mi kennt nä ja. Und mi weis ja: guäti Stück si immer öpis für Kennär!

Ds Stück „DER ABSTECHER“ vom Martin Walser isch när würkläch seeeehr speziu gsi; das cha mä sägä!!! Schouspilärisch iwandfrei, inhautläch... naja. Aber bimnä Kulturalass isch das durchus OK, so lang dr Organisator drmit öpis wot bezwäckä... I ha auerdings no bis hüt nid ganz tscheggät was d Pointä vo däm emotionalä Fürwärk gsi isch. Ei Erkenntnis isch aber blibä: Betrüäg niä dini Frou mitärä Frou wo nä psychopatischä Fründ het.

Mit üsnä acht Iitritä hei mir wahrschiinläch grad dr budgetiert Jahresumsatz vom Theater widär inäghout, schliessläch hei mir meh aus d Heufti vo dä Lüt usgmacht u pro Person 25 Stutz härägleit...!!! D Website vermögä si ömu anschiinänd hüt scho nümme...

Am Schluss simär när no i d Wingsbar, nachdäm einigi no si ga nä Döner im Niderdörfli verdrückä. Zu guter letscht heimär de no chli Schwizär-Kultur wöuä ärläbä u si i di gröschti „Folkore-Abschtigi“ vo Züri. Dert heimär no chli dr Ustusch mit verschidänä stark aukoloisiertä Lüt dörfä betribä u einigi vo üs hätä tatsächläch Chancä gha bi dä Wiiibär..

Dä Kulturevent isch, obwou (nach eigänä Ussagä vom Organisator) würkläch nid sehr dürädänkt, ä kultigi Sach gsi. Merci Luki

Stef