3. Dezember 2005

VMÖ Gourmet Event 2005

Scho fasch traditionsgemäss het o diesjahr im Dezember wieder dr Gourmet-Alass stattgfundä. Dr Chrigu het säch mächtig ids Züg gleit und äs superkuhls Zmorgä bi sich daheimä organisiert. Sogar Grittibänzä hets für jedä gä!

Aschliessend simär id Mattä, wo üs dr Herr Hafen id Kunscht vom Mattä-Englisch igfüärt het. Drbi heimär müässä lehrä, dasäs ä Ungerschied zwüschä Mattä-Bern-Dütsch u Mattä-Englisch git u mä das nid darf verwächslä. D Gheimsprach isch auerdings technisch sehr aspruchsvou u het üs einiges abverlangt. Immerhin chönntämär iz ä Salat i derä Sprach bschteuä!

Nach däm Drill hei mir üs de zum HGO-Stadion verschobä, natürläch mit Bier bewaffnät, u hei däm Vali zumnä ungloublächä Louf verhoufä, natürläch hei d Giälä schlussändläch putzt u mir hei afä rächt einä im Gsicht gha...

Aschliessend simär zrugg id Stadt und im Allegro glandät, wo mir äs Chinois, oder besser gseit ä Husärä-Topf (oder so ähnläch J ) hei gha. U mir hei natürläch, standesgemäss nogradmau zuägschlagä winämorä us üs so richtig la guät ga.

Das het natürläch drzuä gfüährt, dass schlussändläch niemer meh so richtig het mögä u dr Abä relativ gli nächär usklungä isch u numäno Splittärgruppänä dr Marsch über d Chornhuus-Brügg hei i Aspruch gno.

Dr Alass het aber sis Ziu vou erfüut, äs isch eifach ä richtigi Verwöhn-Aktion fürä Magä u natürläch fürä VMÖ-Geischt gsi. Chrigu, merci viu mau!

Stef