8. April 2006

VMÖ Chätzli-Baby-Familien-Event

Nachämnä Unterbuch heimär im 06 wieder ä Chätzli-Event wöuä düräfüärä. Da säch d Usgangslage im letschtä Jahr freudigerwiis veränderet het, het dr Organisator Christian dr Alass richtigerwiis umtouft i Chätzli-Baby-Familiä-Event.

Bereits am 12i hei mir üs im Spycher vom TV Oberwangä troffä um dert ä gmüätlächä Namitag ds verbringä. Glücklächerwiis isch ds Wättär genau a däm Tag schön gsi, so das mir d Sunnästrahlä mit chli Wind hei chönnä gniässä.

Mit viu Fleisch, Gmüäs u Pommes-Chips het mä säch de verpflegt. Dr Chrischä u Marc si de chli spetär zum Ässä cho, da die zwe Vätlä no ihri süässä Töchterä hei umägwägälät.

Nach erfougtär Nahrigsufnahm, gwohnt i richlächäm Usmass, agfüährt vom Hadi, hei mir üs de überä Zuhn ufd Wiesä verschobä. Dort heimär d Caipa (Bandys Hung) ds secklä gmacht, hei Baseball, Football und Boule gspiut u d Frouä hei säch a dä zwöi Nachwuchs-VMÖlerinne erfreut.

Dr Drachä het de d Ufmerksamkeit vo dä Herrä ufsäch zogä, zmingscht solang, bisär i tuusig Stück versplittärät isch. När isch cho, was het müässä cho vor dr WM. Panini-Biudli-Mania… Im Team hei aui ghuufä, di zwöi Karton Pics usdspackä, ds sortierä u idschläbä.

Schliessläch het säch dr ganz Tross ufä Wäg nach Bärn zrügg gmacht, wüu mir am Sibni i näs Theater hei wöuä. Passänd zum Thema simär „Bier für Frauen“ ga luägä. Di afänglächi Skepsis het säch bie dä meischtä gleit u so hei aui das spezieuä Stück (gspiut vo drü adrette Midfifties) chönnä gniässä, ä kulturelli Erwitärig vo däm Alass! Mir hei chönnä erläbä, wie Frouä si, wesi ds viu Bier trinkä...

Zum Abschluss si mir de no ids Resaurant „Punkt“, wo mir üs mit viu Curry u natürläch Bier hei verchöschtigät. Di sehr nätti Bedienig het üs verwöhnt, ds Mineral isch „fliessend“ gsi u o schüsch si aui satt wordä.

Nach viu gepletsche, hät mä säch de eigentläch no id Mahogany-Hall wöuä verschiebä um dert a Claude’s Party abdstanzä. Di meischtä si aber vo däm längä Tag scho rächt erschöpft gsi u so die meischtä hei, teu alei, teu mit Frou, teu zu Ching. Numä no ä ganz chlinä Teil (1 vo 12) isch de no ids Liquid (womä im VMÖ scho guät kennt). Auerdings isch dä Solotripp nach däm schönä Family-Day ender ernüächternd gsi.

Bandy, merci viu fürd Organisation, isch super gsi!!!

Stef